Paalam, Ka Fort, Salamat!

KATARUNGAN PARA KAY DIOSDADO "KA FORT" FORTUNA!

Dalawang tama ng kalibre .45 sa likod habang pauwi sa bahay nila mula sa piketlayn ng Nestle noong gabi ng Setyembre 22. Si Ka Fort o mas kilalang Ding Fortuna, ay ang humaliling Lider ng Unyon ng mga Manggagawa kay G. Meliton Roxas (na pinaslang noong Enero 21, 1988) sa pabrika ng Nestle sa Cabuyao Laguna. Siya'y naging huwarang lider ng mangagawa sa iba't ibang kasapian sa Timog Katagalugan. Isa sa mga taong nakausap ko na kilala siya ng personal ang nagsabing ang pakikipaglaban para sa karapatan ng mga manggagawa na ang naging buhay ni Ka Fort.

Agosto 2002 nang huminto akong tumangkilik sa kahit na anong produkto ng Nestle. Laking lungkot ko nang mapasailalim sa multi-nasyonal na korporasyong ito ang Goya at Bear Brand. Buti na lang may Lala at Alaska pa para bigyan ako ng aking "daily dose of cheap chocolates" at calcium. Isa't kalahating taon mula nang huli akong nakatikim ng Milo, may nakapagsabi sa aking tapos na ang boykot. Sa kabila ng kakulangan ko sa impormasyon kung natapos na nga ba ang boykot ay pinagpatuloy ko ang hindi pagtangkilik sa mga produktong Nestle, dahil sa kadahilanang minsan nang inabuso ng Nestle ang kanilang mga manggagawa. At hindi ako nagkamali sa aking desisyon. Hindi kailan man natapos ang boykot, lalo pa ang piket sa pabrika. At tiyak na ang trahedyang ito ay magbubunsol pa ng mas malawakang boykot at pag-aaklas.

Mag-a-alas diyes na kagabi nang natanggap ko ang mensaheng nasa isang Chapel sa UP ang katawan ni Ka Fort. Hindi ako nagdalawang-isip. Sinuot ko lang ang aking jacket at naglakad sa kahabaan ng Dahlia hanggang may makitang traysikel. Pagdating sa burol, na itinuturing din na pagpaparangal para sa isang dakilang lider-manggagawa, hindi ko naiwasang malungkot. Napakadaming tao. Mga mula sa iba't ibang kasapiang Nasyonal at mga estudyante mula sa iba't ibang paaralan, lalo na mula sa PUP.

Apat sa mga nakasama ni Ka Fort ang nasaksihan kong nagbigay ng mga salita para sa kanya. Hindi nagkakaiba ang kanilang mga sinabi. Si Ka Fort ay huwaran, mapagkumbaba, maaasahan, isang tunay na Lider-manggagawa. Isang tunay na Lider.

Bago umuwi ay dumaan ako sa Mercury Drug sa Tandang Sora. Nakita ko ang isang kaibigan at sinabi sa kanya kung saan ako nanggaling. Pinakiusapan ko rin siyang hangga't kaya niya'y huwag siyang tumangkilik ng Nestle products. Nakakalungkot isipin pero sa maliliit na bagay na ganito lamang ako makapag-aambag sa hustisyang marahil hindi agarang makakamit ni Ka Fort. Mas nakakalungkot kung ang hustisyang ito, na sa Pilipinas ay parang gasgas na plaka, ay hindi na makakamit kailan man.

Katulad ng ibang mga lider-manggagawa at lider ng masa, itinaguyod ni Ka Fort ang karapatan ng kaniyang mga kasama. 28 taon siyang nanilbihan sa Nestle. Duon na siya inuban at humina. Pero nanatiling matatag sa kanyang mga prinsipyo. Duon na rumupok ang kanyang mga buto, pero nanatiling malakas sa pakikibaka.

Sa pagkakataong ito, ngayon lalo na kahit kailan, mas pagtitibayan ko ang pagboboykot sa Nestle. Ito ay isa na namang patunay na "there's blood in your coffee."

Paalam, Ka Fort. At maraming maraming salamat!


27 Sept 2006
1:45 AM