Haggard: The BIR Edition part 2

"Mam, ano po ang kailangan ko para makakuha ng TIN ID?" Inabot ko sa kanya ang hawak kong papel na naglalaman ng buo kong pangalan at TIN.

Mam: Kailangan mong magbayad ng P500 at may monthly dues ka sa BIR
Ako: Nagbabayad naman po ako.
Mam: Kailangan mo muna magregister at magbayad ng P500. Professional ang nakalagay sa iyo dito. May komisyon ka ba sa mga projects mo? Anong klaseng propesyon?
Ako: Ahm, empleyado po ako.
Mam: Bakit professional ang nakalagay dito?
Ako: Ah...hindi ko po alam. (sa loob loob ko, bakit nga ba?) Pano po ba magpalipat para maging Employee?
Mam: Gusto mo maging employee nalang yung tax type mo?
Ako: Opo.
Mam: San ba ang opisina mo?
Ako: Kalayaan po.
Mam: San ka nakatira?
Ako: V Luna po.
Mam: Punta ka sa 39, sabihin mo magpapapalit ka na Local Employee.
Ako: Mam, dun po kame galing.
Mam: Sige, pumunta ka nalang kay Irene ng 2nd floor.

Nagpunta kame sa sumunod na palapag. Tahimik ang hallway. May pinto sa kanan at kaliwa ng hagdanan. Pumasok kame sa kanan. Pagbukas ng pinto, madaming desks. May mga pangalan ang bawat isa nito. Pero ang mga tao, nakakumpol sa likod. Lahat naman sila, lumingon nung may pumasok. Pero bumalik din sa kanya kanya nilang usapan. Tinawag namin ang attention nung babaeng nasa pinakamalapit na mesa.

Ako: Mam, saan po makikita si Ms. Irene ng 2nd floor?
Mam2: Sa kabilang kwarto.

Lumipat kame sa kabilang kwarto.

Kasama ko: Ser, saan po makikita si Ms. Irene?
Ser2: Irene? (tinuro yung babae na nasa likod ng pinto)
Kasama ko: Mam, si Ms. Irene po?
Mam3: Irene? Ng 2nd floor?
Kasama ko: Opo.
Mam3: Akyat pa kayo. (Ngumiti. First time may ngumiti sa kanila. At medyo maganda din siya, kamukha niya si Imee Marcos)

Umakyat kami. Pumasok kami sa unang pinto. Walang babae. Pumasok kami sa sumunod na pinto. Nagtanong ako sa lalaking nasa harapan ng pinto at tila nagsasagot lang ng crossword puzzle.

Ako: Ser, saan po makikita si Ms Irene?
Ser3: (tumingala, banlag sya, tumuro siya sa likod niya. Pero hindi ko talaga alam kung san yun dahil isang mata nya ay nakatingin sa taas, isa ay nakatingin sa kaliwa.)
Bumulong ako sa kasama ko, sabi ko "San kaya yun?" Sabi nya basta magpunta nalang daw kami sa likod.

Nagtanong ako sa kasunod na mesa, tinuro nya sakin yung babaeng nasa dulo. Ganito ang eksena:

Over the shoulder shot, nakatalikod ako sa camera.
Ako: Mam, saan po makikita si Ms. Irene?

CU of employee.
Mam4: Siya yun!
Tuturo sa babaeng nasa dulo, nakaupo sa malaking mesa, nakatingin ang babae sa bandang babang kaliwa niya.

Maglalakad ako at ang aking kasama papalapit sa mesa. Dollying in ang camera kasabay ng bahagyang pag zoom in, para ramdam mo na malapit na malapit na talaga.

Tatayo ako sa harap ng mesa niya, ni Ms. Irene. Maaaninag niya na may tao. Titingala siya, dahan dahan.

POV ko, CU sa mukha ni Ms. Irene. Parang ka-aura nya si Rosa Rosal. Mas batang version.

Zoom out ang camera, makikitang nagpapapedicure pala siya kaya siya nakatungo sa bandang kaliwa.

Cut to POV ni Ms. Irene.

Ako: Mam, kayo po si Ms. Irene?

POV ko. Tatango si Ms. Irene.

MS sa kanan ko. Makikitang may nagpepedicure sa kanya habang kausap nya ako.

Ako: Gusto ko pong malaman kung paano ko malilipat ang tax type ko mula professional to local employee?

Kukuha ng makapal na notepad si Ms. Irene. Neon Orange ito. Magsusulat siya. Iaabot sa akin ang papel. Hindi siya magsasalita.

Kukuhahanin ko ang papel. Babasahin ang nakasulat dito.

Cut to close up nga papel.
tatapusin.